ठसका

१९/०२/२०१७
.
.
.~~~~~~~~~~~~ कालच्या पार्टीत अचानक ती भेटली . कॉलेजात असताना देखील आम्ही मैत्रिणी नव्हतो . ती एका देखण्या , उमद्या मुलाच्या प्रेमात आकंठ बुडाली होती . दोघांनाही आजूबाजूचं जग जाणवतच नव्हतं . त्यांना मात्र अख्ख कॉलेज ओळखत होतं .
काल ती एकटीच आली होती . स्वतःहून जवळ आली . मग खूप रंगल्या आमच्या गप्पा . स्टार्टर फिरत होते , गप्पा रंगत होत्या . ओघातच ती म्हणाली , " प्रत्येक व्यक्ती अनेक रोल्स निभावत असते . प्रत्येक रोल मध्ये ती वेगळी असते . एकच व्यक्ती प्रियकर .. प्रेयसी म्हणून वेगळी ; आणि तिच व्यक्ती नवरा ... बायको म्हणून वेगळी . मला तर वाटतं जिच्यावर आपण दिलोजानसे मुहब्बत करतो तिच्याशी कधीच लग्न करू नये ! "
. " कां ग ? "
" ह्या जगात एकतरी व्यक्ती आपल्यावर , बेहिशेबी , बेफाम , बेफाट प्रेम करणारी आहे ह्याचा विश्वास आयुष्यभर आपल्याला राहतो . "
आम्ही दोघीही बेजार हसलो . पण हसता हसता एकाएकी तिचे डोळे कां भरून आले ,ठसका का लागला ; कळलंच नाही मला . खात असलेलं चिली चिकन इतकं काही तिखट नव्हतं ! पाणी प्यायला म्हणून ती जी उठली , ती नंतर त्या विस्तीर्ण लॉंन वर पुन्हा दिसलीच नाही मला !
तिने त्याच हिरो शी लग्न केलं का . रती मदनाच्या त्या जोडीने आयुष्याचा स्वर्ग केला का ; हे विचारायचं राहूनच गेलं !